Dokter Me di Syn

Dokter Me Di Syn en die keiser se seun

Teks deur Roberto Piumini en illustrasies deur Piet Grobler

Human & Rousseau, 2001

ISBN: 0 7981 4141 7

R44.95

Dis nog vroeg in die jaar, maar 'n mens wonder of daar vanjaar 'n mooier prenteboek in Suid-Afrika gepubliseer gaan word as Dokter Me Di Syn en die keiser se seun!

Die keiser ontbied die beste dokter in die land na die paleis om sy seun gesond te maak. Maar die slimme Dokter Me Di Syn sien dadelik dat prins Hi Po Kon Dri nie regtig siek is nie: sy bleek gelaat het net bietjie son en die pragtige natuurskoon buite die paleis, waar die prins nog nooit was nie, nodig! Dokter Me Di Syn moet dus 'n plan beraam om die prins na buite te lok, en hy doen dit met 'n speletjie wat die prinsie so nuuskierig maak oor wat buite wag dat hy later nie meer sy nuuskierigheid kan beteuel nie.

Dokter Me Di Syn se verhaal leer kinders van die helende krag van die natuur: van die lekkerte van buite speel, maar ook van Dokter Me Di Syn se kruie en plante wat die prins uiteindelik beter laat word het. Piet Grobler se illustrasies komplementeer die verhaal perfek en fokus grotendeels op die plante, diere en voëëls: die medisyne wat die prins uiteindelik gesond gemaak het.

Roberto Piumini het die oorspronklike Italiaanse teks geskryf. Piet Grobler is deur sy Nederlandse uitgewer, Lemniscaat, gevra om die boek te illustreer, waarna Human & Rousseau aan Linda Rode opdrag gegee het om die boek in Afrikaans te vertaal. Piet Grobler was vanjaar amptelike feeskunstenaar van die Klein Karoo Nasionale Kunstefees.